Danobatgroupek jasangarritasun irizpideekin lerrokatuta fabrikazio aurreraturantz duen estrategia indartu du 

• Industria taldeak beste ziklo estrategiko bati ekin dio, jasangarritasuna eta ASG eremuak (Ingurumena, Gizartea eta Gobernantza) funtsezko elementu transbertsaltzat edukita. 

• Euskadin dituen egoitzetan jarritako 8.000 m² eguzki plakei esker, 2024an kontsumitutako energiaren %22 iturri berriztagarrietatik etorritakoa izatea lortu du.

• 2024an, bere ingurunearen eraldaketa sozialean ere urratsak egin ditu 1,2 milioi € baino gehiago hainbat ekimenetara bideratuta.

• Bere laugarren jasangarritasun memoriak 2024an, bere azken plan estrategikoa itxi zen urtean, egindako ekintzak eta lortutako emaitza nagusiak jasotzen ditu. 

Danobatgroup industria taldeak, fabrikazio aurreratuan liderra denak,  jasangarritasuna eta ASG eremuak (Ingurumena, Gizartea eta Gobernantza) dauzka bere estrategiaren elementu transbertsaltzat, orain arte bezala. Apustu irmo hori 2024an sendotu zen, bere azken ziklo estrategikoa itxi zen urtean, Euskadin dituen egoitzetan guztira 8.000 m² plaka fotovoltaiko edukita eta eraldaketa sozialeko ekimenetara 1,2 milioi euro baino gehiago bideratuta. 

Zume horiekin, Danobatgroupek Plan Estrategiko berria ireki du 2025ean, seguru egonda fabrikazio aurreratuaren erronkei aurre egiteko norabide egokian arraun egin duela. Euskadiko ingurunearekin, pertsonekin eta ongizate sozialarekin konprometitutako DNA honek berriro ere berrikuntza teknologikoa, zerbitizazioa, dibertsifikazioa eta nazioartekotzea izango ditu ardatz, eta horietan funtsezko rola izango du. 

Urratsak deskarbonizaziorantz

Ingurumenari dagokionez, 2024an taldeak pauso garrantzitsuak eman zituen deskarbonizaziorantz eta neutraltasun klimatikoa lortzeko helbururantz. Tailer batzuen bidez, Danobatgroupeko kooperatibek haien emisioak aztertu zituzten, hobetzeko aukerak identifikatu zituzten eta datozen urteetan Net Zero helbururako bide orri bat definitzeko oinarriak ezarri zituzten.

Zentzu horretan, 2022tik taldeko enpresa nagusiek urtero neurtzen dituzte erakundearen karbono aztarnaren hiru irismenak. Azterketa horren arabera, 2024an karbonoaren intentsitate indizea (KII) %10,03 murriztu zen, CO2 baliokidearen 887 tonatik 798 tonara igarota fakturatutako milioi bat euroko, eta horrek ingurumen eraginkortasuna nabarmen hobetu dela adierazten du.

Aldi berean, Danobatgroupek trantsizio energetikoarekin duen konpromisoa indartzen jarraitzen du. Gaur egun, 8.000 m² baino gehiagoko azalera du eguzki plakez estalita Euskadin, eta ildo horretan urratsak egiten jarraituko du kontsumitzen duen energiaren heren bat iturri berriztagarrietatik etor dadin.

Gainera, 2024n Soraluce kooperatibak urrezko LEED ziurtagiria ("Leadership in Energy & Environmental Design") lortu zuen bigarren aldiz bere fabrikazio lantegi baterako. Eta, bere produktuen ingurumen inpaktuari dagokionez, 2024an bi makina  modelo berrik ekodiseinuaren ziurtagiria eskuratu zuten, ISO 14006 arauaren arabera; hortaz, guztira 26 modelok dute ziurtagiri hori dagoeneko. 

Danobatek, berriz, DHD-T hobiko tornuaren bizi zikloaren analisia egin zuen, eta lortutako emaitzekin Produktuaren Karbono Aztarnaren (PKA) eta Produktu Ingurumen Aztarnaren (PIA) txosten bat ere egin da.

Taldeak mugikortasun jasangarria eta bidaietarako gutxiago kutsatzen duten bideak ere sustatzen ditu langileen artean. Horretarako, app bat erabiltzen du, non taldeko pertsonen %30 baino gehiago erregistratuta dauden. 2024an,  28.042 kg CO2 isurtzea saihestu zen, langileek lantokirako joan-etorriak egiteko garraio partekatua edo bizikleta erabiltzeari esker. 

Konpromiso soziala: Pertsonak eta Komunitatea

Gizarte mailan, mundu osoan 1.459 langileko plantilla izanda eta langile horietatik 1.000 Euskadin izanda, Danobatgroupek lan ingurune osasungarriak, berdintasunezkoak eta inklusiboak sustatzen jarraitzen du, taldeko enpresa guztietan ezarritako berdintasun planen eta plantillaren osasuna eta ongizatea sustatzeko programa eta ziurtagirien bidez. Gainera, erakunde barruan zein kanpoan talentuaren garapena bultzatzen duten ekimenak sustatzearen alde egiten du.

2024an, belaunaldi berrien artean eta, bereziki, emakumeen artean bokazio zientifiko-teknologikoak sustatzeko erronkari erantzuteko, Danobatgroupek hainbat ekimenetan parte hartu zuen, esaterako, Mondragon City Challengen, ZTIM HUBen, Zientzia Azokan, Bizilaben, Debegesako enpresa industrialetako Nesken Egonaldietan, Gladys sarietan, Ada Byron sarietan, Mondragon TFG/TFM  sarietan eta IMH sarietan.

Ingurunearekin duen konpromisoari dagokionez, taldeak urtero ehunka ekimen bultzatzen ditu helburu sozialetara bideratutako funtsen bidez, bere erantzukizuna eta komunitatearekiko lotura berretsiz. 2024an, Danobatgroupek 1.277.738 € erabili zituen garapen sozialera bideratutako ekintzetarako, bere eragin eremuan eragin positibo eta jasangarria sortzen lagunduta.

Gainera, Elkarrekin Eragin eraldaketa sozialerako programa parte hartzailearen hirugarren edizioa egin zuen, eta horretarako 600.000 euro jarri zituen hiru urterako.

Aurrerapenak gobernantzan eta jasangarritasun korporatiboan 

Gobernantzaren esparruan, industria taldeak materialtasun bikoitzaren azterketa egin zuen 2024an, gai garrantzitsuak identifikatzeko prozesua ikuspegi bikoitz batetik eguneratzeko, eta, gainera, bere jasangarritasun estrategia 2025ean, Nerea Aranguren zuzendari nagusi dela, abiatuko den ziklo estrategiko berriaren ikuspegiarekin lerrokatzeko. 

Era berean, eta hornidura kate jasangarriagoa eta erresilientea bultzatzea jomuga izanik, taldeak HAZI proiektua abiarazi zuen, Ategi Mondragoneko erosketa zentralarekin elkarlanean. Ekimen horrekin, Danobatgroupek erosketen jasangarritasunean aurrera egiteko ekintza plan zehatz bat diseinatu ahal izango du erosketen eta hornitzaileekiko harremanen jasangarritasunean aurrera egiteko eta bere DNA jasangarria balio katean integratzeko.

Danobatgroupek ASG alderdiekin duen konpromisoari lotutako ekintza eta emaitza guztiak eskuragarri daude taldearen laugarren Jasangarritasun Memorian.

Danobatgroupi buruz
 
Industriako fabrikazioari aplikatutako teknologikoen alorrean 70 urteko ibilbidea eginda, Danobatgroupek trebakuntza handiko 1.400 pertsona baino gehiago ditu plantillan, eta 344 milioi euroko fakturazioa. Taldea MONDRAGON Korporazioko kide da, eta makina-erremintaren eta fabrikazio aurreratuaren sektorean nazioarteko erreferentea, eta Danobat, Soraluce eta Goimek dira bere enpresa nagusiak.