Taldea MONDRAGON Korporazioko kidea da eta 70 urteko ibilbidea egina du doitasun handiko sistemak garatzen eta fabrikaziorako diren teknologiak ikertzen eta aplikatzen. Makina-erreminten fabrikatzailerik handiena da Espainian, eta ekoizle nagusietako bat Europan. 1.400 pertsona baino gehiago enplegatzen ditu, eta urtean 300 milioi eurotik gorako fakturazioa du; fakturazio horretatik, %90 baino gehiago nazioarteko merkatuetatik dator.
Taldeko enpresa nagusiak hauek dira: Danobat, artezteko makinen, torneatzeko makinen eta doitasunezko roboten Europako fabrikatzaile nagusietako bat, Hembrug eta Overbeck filialen eskaintza barne hartzen duena; Soraluce, fresaketa, mandrinaketa eta funtzio anitzeko teknologian mundu mailako fabrikatzaile aitzindaria; eta Goimek, doitasunezko mekanizazioetan eta mekanizazio handietan espezializatutako enpresa. Etorkizuneko erronkei aurrea hartzeko, bere balio proposamena dibertsifikatzeko eta aukera berriak esploratzeko, Danobatgroupek aliantzen politika bat ere badu aktibo, enpresa berriak eskuratuta, startup-en kapital sozialean parte hartuta edo hurbileko arloetan lankidetza estrategikoak bultzatuta, besteak beste Savvy, Endity eta Novak enpresekin egin duen bezala.
Nazioarteko bokazioa izatea eta kanpoko merkatuetara irekita egotea izan dira beti Danobatgroupen nortasun ezaugarrietako bat, eta enpresak fabrikazio lantegi gehienak Euskadin dituen arren, Alemanian, Herbehereetan eta Estatu Batuetan ere baditu fabrikazio plantak, eta Bikaintasuneko Zentroak herrialde estrategikoetan, hala nola Alemanian, Italian, Herbehereetan, Estatu Batuetan eta Txinan.
